Kryetari i Partisë Demokratike të Kosovës, Memli Krasniqi me rastin e shënimit të 23 vjetorit të themelimit të Policisë së Kosovës ka shprehur mirënjohje për punën e këtij organi të sigurisë.

Në një postim në Facebook, Krasniqi është shprehur se Shërbimi Policor i Kosovës, që më pas u shndërrua në Polici të Kosovës, i ka hapur rrugë mbrojtjes së qytetarëve, rendit dhe ligjit në vendin tonë.

“Partia Demokratike e Kosovës ka ndërmarrë nismën për hartimin e Projektligjit për Pensionimin e Parakohshëm të zyrtarëve të Policisë së Kosovës dhe punonjësve të Inspektoratit Policor me autorizime policore – të cilin jemi të përkushtuar ta dërgojmë deri në fund. Aktualisht, Policia jonë, ndonëse me kushte jo të favorshme të punës, e pa paga dinjitoze, mbetet një ndër institucionet më të shquara që ofron shërbim e siguri për secilin, pa dallim. Respekt për punën dhe angazhimin e mijëra grave e burrave që ndër vite kanë vendosur të shërbejnë në Policinë Kosovës, duke ju përmbajtur me dinjitet vizionit, misionit dhe vlerave të këtij profesioni fisnik. Përherë mirënjohës!”, shkruan lideri i PDK-së./arbresh.info/